म. टा. प्रतिनिधी, नागपूर: उपराजधानी असलेल्या जिल्ह्यात होत असलेला जिल्हा बालसंरक्षण कक्षाच्या पथकाने रोखला. कामठी येथील एका १४ वर्षांच्या मुलीचा विवाह २१ जुलै रोजी होणार होता. एकीकडे समाज सुधारला असे म्हटले जात असताना गेल्या सव्वा महिन्यातील ही तिसरी घटना असल्याने चिंता व्यक्त करण्यात येत आहे. बालविवाह प्रतिबंधक कायद्यानुसार लग्नासाठी मुलीचे वय १८ वर्षे आणि मुलाचे वय २१ वर्षे असणे बंधनकारक आहे. असे असतानाही आजही बालविवाह होत असल्याचे धक्कादायक वास्तव आहे. गेल्या महिनाभरातील हा तिसरा बालविवाह रोखण्यात प्रशासनाला यश आले आहे. जिल्हा महिला व बालविकास अधिकारी अपर्णा कोल्हे यांच्या आदेशानुसार जिल्हा बालसंरक्षण अधिकारी मुस्ताक पठाण, संरक्षण अधिकारी विनोद शेंडे, अनुप देशमुख, चाइल्ड लाइनच्या समन्वयिका छाया गुरव-राऊत, सारिका बारापात्रे, पोलिस उपनिरीक्षक कल्पना कटारे, पंकज मारसिंगे, अंगणवाडी सेविका स्मृती दहाट, रंगराजन पिल्ले यांनी ही कारवाई केली. मुलीच्या आई-वडिलांचे समुपदेशन करण्यात आले. मुलीचे वय १८ वर्षे होत नाही तोपर्यंत विवाह करणार नाही, असे हमीपत्र लिहून घेण्यात आले आहे. लग्न झाल्यास बाल विवाह प्रतिबंधक कायदा २००६ नुसार वर व वधूकडील मंडळींवर कारवाई करण्यात येणार असल्याचा इशाराही यावेळी प्रशासनाने दिला. सव्वा महिन्यातील तिसरी घटना आज काळ बदलला…. शिक्षणामुळे नागरिक जागरूक झाले… मुलींच्या शिक्षणालाही तेवढेच प्राधान्य दिले जात आहे…समाजातील हे सकारात्मक चित्र असले तरी आजही अनेक कुटुंबात मुलींना आर्थिक परिस्थितीमुळे शिक्षण अर्धवटच सोडावे लागत आहे. २८ मे रोजी अशाच दोन मुलींचे बालविवाह रोखण्यात आले होते. या घटनेनंतर सव्वा महिन्याच्या आतच तिसरी घटना कामठी येथे पुढे आली. नगरमध्येही लॉकडाऊनच्या काळात २० बालविवाह रोखले... ग्रामीण भागात ऊस तोडणी कामगार, मजूर, गरीब शेतकरी यांच्यासाठी मुलींचे लग्न हे आव्हानच मानले जाते. समाजासोबत राहण्यासाठी रुढी-परंपरा, मानपान यांचे पालन करीत लग्न करायचे म्हणजे डोक्यावर कर्जाचा डोंगर असे चित्र अनेकदा पहायला मिळते. लॉकडाउनच्या काळात केवळ पन्नास लोकांच्या उपस्थितीत आणि घरच्या घरी लग्न करण्यास सरकारने मुभा दिली. अर्थातच नाईलाजानं का होईना, याला समाजमान्यताही मिळाली. हीच संधी समजून अनेक गरीब वधूपित्यांनी कायद्याच्या अज्ञानातून तर कुठे नाइलाजातून आपल्या मुली उजविण्यास सुरुवात केल्याचे आढळून येत आहेत. कारण एकट्या नगर जिल्ह्यात लॉकडाउन काळात जवळपास वीस बालविवाह चाइल्ड लाइनने रोखले आहेत. गेल्या आठवड्याचीच आकडेवारी पाहता चाइल्ड लाइनच्या पथकाने शेवगाव, पारनेर, अकोले, पाथर्डी व नगर या पाच तालुक्यांमध्ये प्रत्येकी एक असे एकूण पाच बालविवाह रोखले आहेत. यासाठी त्यांना जिल्हा बाल कल्याण समिती, जिल्हा महिला व बालविकास अधिकारी, जिल्हा बाल संरक्षण अधिकारी, पोलीस प्रशासन, बालविकास प्रकल्प अधिकारी, ग्रामसेवक, अंगणवाडी सेविका आदींची मदत झाली आहे. अर्थात यंत्रणेपर्यंत माहिती न पोहचलेले असे अनेक लग्न झाले असल्याची शक्यता नाकारता येत नाही. लॉकडाउनच्या काळात लग्नासाठी कमी खर्च येत असल्याचे पाहून अनेक गरीब वधूपित्यांनी अल्पवयीन मुलींची लग्नंही उरकून घेण्याचा सपाटा लावल्याचे नगरमधील चाइल्ड लाइनकडे प्राप्त होणाऱ्या तक्रारींवरून दिसून येत आहे. लॉकडाउन काळात एकट्या नगर जिल्ह्यात असे २० बालविवाह चाइल्ड लाइनने रोखले आहेत. बालविवाह लावून देण्याचे सर्वात जास्त प्रयत्न पाथर्डी तालुक्यात होत असल्याचे आढळून येत आहे.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/38IBI6u
via IFTTT
No comments:
Post a Comment