राजकीय नेते व सेलिब्रिटिंच्या मुलाखती हा प्रकार मीडियासाठी नवा नाही. अशा मुलाखती होतच असतात. निवडणुकांच्या काळात तर राजकीय नेत्यांच्या मुलाखतींना बहर आलेला असतो. एखाद्या मोठ्या नेत्यानं मुलाखत दिल्यानंतर त्यातील वक्तव्यामुळं अनेकदा वादळंही उठतात. देशात यापूर्वी असं अनेकदा झालं आहे. मात्र, एका होणाऱ्या मुलाखतीची (झालेल्या नव्हे) सध्या सर्वत्र जोरदार चर्चा आहे. ही चर्चा फक्त मीडियातच आहे असं नव्हे तर देशभरातील राजकीय वर्तुळात आहे. ती मुलाखत आहे राष्ट्रवादी काँग्रेसचे अध्यक्ष शरद पवार यांची. शरद पवार हे काही वादग्रस्त किंवा सनसनाटी वक्तव्य करणारे नेते म्हणून ओळखले जात नाहीत. तरीही त्यांच्या आगामी मुलाखतीबद्दल सर्वांनाच उत्सुकता आहे. शरद पवार हे काय बोलणार याकडं लक्ष लागलं आहे. अर्थात याला कारणंही बरीच आहेत. बदललेल्या महाराष्ट्रात आणि देशातही बदललेल्या राजकीय परिस्थितीत पवारांच्या प्रत्येक भूमिकेला कमालीचे महत्त्व आहे.शरद पवारांच्या मुलाखतीबद्दल होणाऱ्या चर्चेचं पहिलं कारण आहे ते म्हणजे ही मुलाखत ते शिवसेनेचं मुखपत्र असलेल्या दैनिक 'सामना'ला देणार आहेत. शिवसेनेचे नेते संजय राऊत ही मुलाखत घेणार असून ती उद्या, ११ जुलैपासून ती प्रसिद्ध होणार आहे. शरद पवार हे सात महिन्यांपूर्वीपर्यंत शिवसेनेचे विरोधक होते. मूळचे काँग्रेसी असल्यामुळं ते नेहमीच शिवसेनेच्या निशाण्यावर होते. त्यांची ही भूमिका आता बदलली आहे. त्यानंतर 'सामना'ला त्यांनी दिलेली ही पहिली मुलाखत आहे.
महाराष्ट्रात शिवसेना-काँग्रेस आणि राष्ट्रवादी काँग्रेसच्या महाविकास आघाडीचं सरकार आणण्यात शरद पवार यांचा सिंहाचा वाटा आहे. गेले सात महिने हे सरकार राज्यात सत्तेवर आहे. उद्धव ठाकरे हे सरकारचं नेतृत्व करत आहेत. वर्षानुवर्षे सत्तेत राहिलेले व सत्तेचा मोठा अनुभव असलेले काँग्रेस-राष्ट्रवादीचे नेते तुलनेनं नवख्या उद्धव ठाकरे यांच्या नेतृत्वाखाली काम करत आहेत. त्यातून आघाडीमध्ये सातत्यानं कुरबुरी होत असल्याची चर्चा आहे. शरद पवार हे वेळोवेळी प्रत्येक प्रश्नावर मध्यस्थी करताना दिसत आहेत. शिवाय, राज्यातील महत्त्वाच्या प्रश्नांवर मुख्यमंत्री व सरकारला सल्ले देत आहेत. हे सगळं नेमकं काय गौडबंगाल आहे यावरही मुलाखतीत पवार बोलले आहेत.
महाराष्ट्रात भाजपला वगळून एखादं सरकार येईल असं निवडणुकीच्या निकालानंतरही काही दिवस कोणाला वाटलं नव्हतं. पडद्याआड बऱ्याच घडामोडी होऊन अखेर ते सरकार प्रत्यक्षात आलं. मात्र, त्यावेळच्या घडामोडींबद्दलच्या चर्चा थांबलेल्या नाहीत. विरोधी पक्षातील नेते अजूनही अधूनमधून याबाबत बोलत असतात. अलीकडेच देवेंद्र फडणवीस यांनी एका मुलाखतीत गौप्यस्फोट केला होता. शरद पवार यांनी स्वत: भाजपशी युतीचा प्रस्ताव दिला होता, असं फडणवीस म्हणाले होते. पवारांनी त्यावर कुठलंही सविस्तर उत्तर दिलेलं नाही. या मुलाखतीत ते राष्ट्रवादीची बाजू मांडण्याची दाट शक्यता आहे.
शरद पवार हे देशाचे संरक्षण मंत्री राहिलेले आहेत. गेली अनेक वर्षे ते दिल्लीच्या वर्तुळात वावरत आहेत. देशातील सर्वच पक्षाच्या नेत्यांमध्ये त्यांच्याबद्दल एक आदराची भावना आहे. त्यामुळं महाराष्ट्राशिवाय देशपातळीवरील विषयांवर त्यांची मतं महत्त्वाची ठरतात. त्यातील देशाच्या राजकीय इतिहासाला कलाटणी देणारी घटना म्हणजे राम मंदिर आंदोलन. पवार हे या आंदोलनाबद्दलही बोलले आहेत. त्याच अनुषंगानं त्यांनी भाजप या पक्षाविषयी देखील मतं मांडली आहेत.
राजकीय विरोधक असले तरी शिवसेनाप्रमुख दिवंगत बाळासाहेब ठाकरे यांच्याशी शरद पवारांचे मित्रत्वाचे संबंध होते. विरोधक आणि मित्र म्हणून शरद पवार हे बाळासाहेबांच्या स्वभावाशी परिचित होते. त्याच बाळासाहेबांचे उत्तराधिकारी उद्धव ठाकरे यांच्यासोबत सध्या ते काम करत आहेत. ठाकरे पिता-पुत्रांच्या कार्यपद्धतीत पवारांना नेमका काय फरक वाटतो तेही या मुलाखतीत ऐकायला मिळणार आहे.
शरद पवारांच्या या मुलाखतीचे प्रोमो संजय राऊत रोजच्या रोज सोशल मीडियातून शेअर करत आहेत. त्यातील प्रश्न पाहिल्यावर मुलाखतीबद्दलच्या उत्सुकतेचं कारण समजतं. मुलाखतीमधील काही प्रश्न असे... महाविकास आघाडीचे तुम्ही हेडमास्तर की रिमोट कंट्रोल? ठाकरे सरकारचं भविष्य काय? महाराष्ट्रातील आजच्या विरोधकांना काय सल्ला द्याल? भाजप आणि बाळासाहेबांचे विचार कधीच जुळणारे नव्हते? महाराष्ट्रातील सत्ताबदल हा अपघात होता का?
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/2BViP4s
via IFTTT
No comments:
Post a Comment